Maminta Gondang Huria

MANJOU GONDANG 
Copy posting oleh Pdt DTA Harahap

 












ALUALU

Hamu amang inang, hahahaanggi dohot pinaribot,
parroha na uli na marpangarop
Marmula somba huasi tu Debatanta Siparorot,
Ima Amanta di bagasan Jesus, Sipanompa Sipanjadi,
pasu-pasuNa pe manorop.
Nang di hamu amang inang parhalado ni huria
Na mananti di mula asi, na mangampu di mula tua
Na pasahat somba huasi, na mangabing sahala tua
sian Debata Ama, Anak dohot Tondi Porbadia
Dohot tu hamu, amang panggual pargonsi
Na jinou manogot, na nialapan botari.
Rap ma hita Amang sisada tangiang sisada haporseaon
Pagorjok-gorjok udan padungdang-dungdang ari,
Martangiang mangido tua sian Amanta Debata Sipanjadi,
Alu-aluhon ma jolo damang, amang pandenami,
Tu Debatanta Sipanjadi, na patuat asi.
(taganing)

Aluhon-aluhon ma damang,
Tu Tuhan Jesus Kristus, Malim Ihutan, Tuhan Sipalua
Naung rade manaon na porsuk asa malua jolma sian hamatean dohot sian dosa
(taganing)

Alu-aluhon ma damang,
Tu Tondi Porbadia na ro sian Debata Ama dohot sian Jesus AnakNa
Na pajongjong huria na badia na patolhas hasesaan ni dosa.
(taganing)

MANJOU GONDANG
Jongjong hami dison, margondang somba margondang mula,
Pinillit so marlaok bota, pinasu-pasu so ra mahua.
Ai di rohanta do manggora sian dia mula ni jolma,
Nang portibi saluhutna, na jinadihon ni Debata.
Anggiat di baringin na jinujungna, sai ampe pasu-pasu dohot sahalatua,
Ojak ma di tatuan jala jujung di sambubuna,
Asa hot so hariboan sarimatua so mahua.
Dihatindangkon buku na badia:
Debata do na manompa langit dohot tanoon dohot nasa isina.
Ibana do mula ni hosa, na manjadihon saluhutna.
Debata do mungka ni bona, Ibana do Raja Sipanompa,
Na manompa sian na so adong, na manjadihon sude marhite Hata,
Mula ni duhut marlata, mungka ni onggak marsoara
Ima Ama ni Jesus i, Debata so marsamari,
Na patolhas-tolhas asi tu siminik sombahuasi.
Ima Tuhanta Parasiroha, Debata Ama, Anak dohot Tondi Porbadia
Na marhuraja-marmulia, na manompa saluhutna.

Ai di mula ni mulana ditompa Debata ma langit dohot tano.
Jala sude isina dipaojak do dipago.
Na lilu, na maot-aot, na mandiori di dalan haho,
Tu hita dipasaor tiur ni roha jumadi ramot.
Asa dung gok ma tingkina, sahat taon na binuhulna,
Ditongos Ama I ma Anak Sasada,
Ima Jesus Kristus, Sipalua, mardongan Tondi Porbadia.
Jala di Tuhanta Jesus Kristus sahat ma tua hagogokna
Na so hea diida mata so hea didodo roha
Naung diparade Debatanta di na porsea na tinodoNa.
Ai nunga talu hamatean dibahen Tuhan Jesus i.
Ai sude hita panean di hatuaon sangapNa i.
Ai diapus nasa ilu, jala dipadao nasa ribo,
Ai disesa do dosanta, hamatean pe dirobo.
Asa disi ma landina, disi ma landona
Disi hinadaina, disi hinatabona,
Disi hinajogina disi ma hinagokNa.

MANANGIANGHON GONDANG
Tapaunduk ma simajujung tapaserep ma roha
martangiang ma hita:
Ale Tuhan Debata Jahowa,
Sitompa tano dohot langit, dohot nasa isina.
Debata ni ompunami si Abaraham, si Isak dohot si Jakob,
Debata ni damang dohot dainang na manubuhon hami.
Ho do Ama Siparasi, Ama ni Jesus Tuhannami,
Na marlas ni roha marpanari, na pasahat gok asi
Tatap ma huriaMon na marsahata huhuasina.
Paimbaruhon haporseaon papitahon panghirimonna,
Mengelek gogo sian Ho, ngolu ni tondina.
Manumpan gondang na sabangunan,
Mula ni dudu mungka ni dungdang.
Mamestahon haluaon napinatupa ni AnakMu, Jesus Sipalua,
Sai manatap-manonggor ma Ho
Sian ginjang ni ginjangan, sian langit ni langitan.
Sai dumatang-manorop ma Ho marhite Tondi Porbadia.
Sai mamungka-mambona ma Ho di dungdang parsaulian.
Sai mamungka-manjadi ma Ho, di parsaoran ni huria.
Daulad-satahi hami manomba Ho, Tuhannami na marmulia.
Patolhas tangiang mangelek Ho, pasahat ende puji-pujian.
Manjujung poda na sian Ho, mangampu sorang parsaulian.
Di ngolu on, nang ari sogot, ro di ari marhapudian.
Di na ro AnakMu na tinodo manotar dodo ruji-rujian,
Sai lias ma hami sian bonos, muli ma holso, dao ma bobos.
Sian AnakMu tumangi doho, ojak ma hami marpangampinan.
Manjangkon surgo marhalioho, polin ma hami marhabadiaon.
On ma hupangido hami marhite-hite AnakMu Jesus Kristus,
Tuhan na mangolu na mangarajai,
Nuaeng, tongtong ro di saleleng ni lelengna.
AMEN.

MANJOU GONDANG MULA-MULA DOHOT SOMBA-SOMBA
Amang panggual-pargonsi, partarajuan na uli
Na malo mangalu-alu na uja marhuhuasi
Di bagasan goar ni Debata Ama, Anak dohot Tondi Porbadia
Bahen damang mula ni gondang i.
Mungka ni dungdang mula ni somba.
Bahen damang mula ni gondang
Mula ni gondang dudu na jumadi gondang dungdang.
Mula ni tano tubu mungka ni duhut marlata

Laos padomu damang ma i tu gondang somba.
Gondang somba tu Debata Jahowa na manompa hangoluan.
Gondang somba tu Jesus Kristus, Malim Ihutan Raja Sipalua.
Gondang somba tu Tondi Porbadia, na patoguhon huria na badia,
Jongjong hami dison, manjujung tangan, jari-jari
Tu Debata Ama Sitompa tanoon, pangisina dohot langit.
Somba ni nasa tumadong, tu Jahowa Sipanjadi.
Mungka ni hatuaon mula ni bona ni ari.
Bahen damang Gondang Mula dohot Gondang Somba i.

MANJOU GONDANG LIAT-LIAT
Nuaeng pe Amang pandenami,
Naeng mangaliat ma hami mamuji pasangaphon Debata
Ama, Anak dohot Porbadia i.
Nunga hujalohami Pandidion Na Badia,
Manguras hami sian dosa pabongothon hami tu hangoluan na so ra suda.
Asa ias hami so hasurahan, di na uli so ra tarila.
Raphon AnakMu marjambar hami di hatuaon na badia,
Martua manean asi, di salelengna mariaria.

Dipodahon Jesus Tuhan Sipalua I do hami
Ingkon mangaliat do hami di ngolu siganup ari
Ringgas mangula hinsa manjalahi
Ingkon mangaliat do hami nang mamaritahon barita na uli
Patupahon ulaon parasian dibagasan roha na sai marpanari
Asa liat ma parhorasan liat ma hatigoran
Ris ma hadumaon, ris ma hadameon.

Antong bahen damang ma gondang liat-liat i.

MANJOU GONDANG SITIO-TIO DOHOT HASAHATAN
Amang Panggual Pargonsi, partarajuan na uli!
Tapaudut ma tu gondang sitio-sitio-hasahatan,
Asa tio di parhorasan, tio di hadameon.
Sai marporda ma i songon panggu, marsuhul ma sinalenggam.
Sai marbona ma i di pasu-pasu, marhaujungan ma i di na denggan.

Asa binanga ni Sihombing binongkak ni tarabunga;
Tu sanggar ma amporik, tu lubang ma satua.
Sinur ma pinahan, jala gabe na niula.
Imbur magodang angka na ummetmet, saur matua natua-tua;
Mardangka ma ubanna limut-limuton tanggurungna,
Horas ma pardalan-dalan songon i na tading di huta.
Tumpakon ni Tuhanta, Debata Ama na martua.

(diikutip dengan perubahan sana-sini dari lembaran lepas peresmian gereja katolik di Tapanuli kemungkinan disusun oleh Mgr AB Sinaga)